Американскиот автомобилски гигант „GM“ планира да инвестира 691 милион долари во проширувањето на капацитетите во Мексико, кој е атрактивна инвестициска дестинација за автомобилите поради ниските плати и близината на САД.
Мексиканскиот претседател Енрике Пена Нието го изрази своето задоволство за плановите на ГМ, истакнувајќи дека „тоа е добро за бизнис плановите на компанијата, но и за нашата земја, бидејќи покажува доверба и создава нови работни места“.
„GM“ наведува дека 349 милиони долари ќе бидат инвестирани во нова фабрика во градот Силаоу, кој ќе произведува осум-брзински менувач, 211 милиони се наменети за проширување на комплексот во Толука, а 131 милион за проширување на фабриката за новата генерација на менувачи во Сан Луис Потоси.
Мексико по големина е осмиот производител на автомобили во светот, а минатата година тој беше на четвртото место според пласманот на извозниците.
Вкупно минатата година во таа земја беа произведени околу 2,8 милиони возила, вклучувајќи ги и 571.000 возила од „GM“.
