Кина оваа година планира да инвестира 650 милијарди јуани (околу 103 милијарди долари) во изградба на железничка пруга.
Ова е малку повеќе од вложениот износ од минатата година, изјави министерот за железници Шенг Гуангџу.
Новите железнички линии со вкупна должина од 5200 километри ќе бидат ставени во функција оваа година, изјави министерот. Иако сумата е нешто поголема од потрошените 630,98 милијарди јуани во 2012, таа е пониска од рекордните 842.65 милијарди јуани вложени во тој сектор во 2010 година, покажаа податоците од Министерството, пренесе Капитал.ба.
Министерството ќе настојува да се зголемат изворите на финансирање кои ќе учествуваат во изградбата на железниците, преку поттикнување на локалните власти, приватните компании и приватните инвеститори, изјави Шенг.
Ќе биде формиран национален фонд за развој на железниците во кој ќе може да инвестира јавниот и приватниот капитал, рече министерот.
Според петгодишниот план за развој, Кина до 2015 година ќе има железници долги околу 120.000 километри , вклучувајќи 18.000 километри железници со голема брзина и експрес железници од 40.000 километри.
