Американската банка „JP Morgan Chase“ пријави најголем квартален профит во својата историја, кој пред се е последица на новиот даночен закон усвоен лани во САД.
Банката „JP Morgan Chase“, најголемата американска банка според обемот на актива и депозити, оствари добивка од 8,71 милијарди долари во првиот овогодишен квартал, што е за 35 проценти повеќе во однос на профитот од 6,45 милијарди долари од истиот период минатата година, пренeсува агенцијата АП.
За таквите резултати најмногу придонесоа два фактори – поголемите каматни стапки, што на банката и овозможи на клиентите да им наплатува поскапо за позајмици и значително пониската стапка на корпоративниот данок.
Приходите на банката пред оданочување во тој квартал се зголемени за 2 милијарди долари, а банката исплатила 240 милиони долари помалку на име на данок во однос на една година претходно.
