Ракометнот клуб Вардар објави дека ги пуштил во продажба блок-билетите за завршниот турнир во СЕХА-лигата, што ќе се одигра во Скопје, во периодот од 13. до 15 април.
„Од 22 март до 1 април 2018 година ќе се продаваат блок- билети за двата натпреварувачки денови по цена од 300 денари. Од 2 април ќе почне продажбата на поединечни билети и тоа по цена од 200 денари за еден натпреварувачки ден“, се вели во клупското соопштение.
Од клубот исто така ги информираат ракометните фанови дека Вардар е само технички организатор на овој турнир, поради што сезонските билети нема да важат. Организатор на турнирот е СЕХА-лигата.
Во меѓувреме, лигата објавија дека претходно објавениот распоред за одигрување на натпреварите е сменет, односно Вардар ќе го игра првиот меч протв Мешков Брест (17:45 часот), а потоа ќе играат ППД Загреб и Целје (20:15 часот).
Во истите термини на 15 април најпрвин ќе се одигра натпреварот за третото место, а потоа и финалниот меч.
Вардар на домашен терен ќе ја брани титулата освоена минатата година.
