Европската поделба на „Honda“ конечно ги откри карактеристиките на новата генерација на хечбекот „Civic“, чија продажба стартува од 1-ви февруари. Моделот беше претставен уште минатата година, но до моментов дел од параметрите на моторите се чуваа во тајност.
Познато е дека моделот ќе се нуди со избор од два бензински мотори – 1,0-литарски со 3 цилиндри и 1,5-литарски со 4 цилиндри. Сега од „Honda“ ја соопштија и нивната моќ. Помалиот ќе развива 129 КС и 200 Нм, а поголемиот е со 182 КС и 240 Нм. Менувачите се 6-брзински мануелен и автоматски.
Со моќниот мотор „Civic“ ќе забрзува од 0 до 100 км/ч за 8,2 секунди (со рачни брзини) и 8,5 со автоматски. Кај 1,0-литарскиот мотор времето е 10,2 и 11,2 секунди. Кај 1,5-литарскиот агрегат мешовитата потрошувачка е меѓу 5,8 и 6,1 л/100 км, а кај 1,0-литарскиот – меѓу 4,7 и 5,1 л/100 км.
Димензиите на хечбекот се должина од 4518 мм, ширина од 1799 мм, висина од 1434 мм и растојание помеѓу двете оски од 2698. Тежината на автомобилот се движи помеѓу 1299 и 1397 килограми во зависност од агрегатот и нивото на опрема. Волуменот на багажникот е 478 литри кај верзијата со 5 врати, а резервоарот вклопува 46 литри.
Во кабината на европскиот „Civic“ е поставен 7-инчен екран на допир на системот „Honda Connect 2“ работат со „Apple CarPlay“ и „Android Auto“. Тој се потпира и на 4-core процесор „Nvidia Tegra 3“. Достапни се и два вида аудиоститеми со 180 или со 449 вати.
Хечбекот добил и најсовремени системи за безбедност од комплексот „Honda Sensing“. Во основната опрема влегуваат систем за автоматско сопирање, асистент за следење на лентата на движење, функција за откривање на знаци, адаптивен круз-контрол и друго. Особено за Европа се направени нови поставки на системот за стабилизација, а како опција се нудат индивидуализирани амортизери.