„Honda“ ја претстави европската верзија на 10-тата генерација на хечбекот „Civic“. Јавното деби на моделот ќе се одржи за време на стартот на автомобилскиот саем во Париз на крајот на месецот.
За возилото се предвидени исклучиво 3- и 4-цилиндричен турбомотор, а самиот тој е изграден на нова платформа, благодарение на која е полесен за 16 килограми во споредба со својот претходник.
Димензиите на хечбекот се должина од 4497 мм, ширина од 1800 мм и висина од 1421 мм. На овој начин новиот „Civic“ е за 130 мм подолг, за 30 мм поширок и за 20 милиметри понизок од претходната генерација. Растојанието помеѓу двете оски е зголемено за 30 мм и веќе достигнува 2700 мм. Волуменот на багажникот останува ист – 478 литри.
Во палетата мотори влегуваат 2 нови бензински турбомотори – 3-цилиндричен со зафатнина од 1,0 литар, развива 127 КС, како и 4-цилиндричен со зафатнина од 1,5 литри. Неговата моќност е 180 КС. Агрегатите можат да се комбинираат со 6-брзински мануелен менувач или со вариаторна трансмисија. Податоци за динамиката и потрошувачката на горивото засега не се објавени. Во подоцнежна фаза ќе се нуди и 1,6-литарски дизел со околу 120 КС.
Автомобилот доби дигитален инструмент панел со „TFT“ дисплеј, како и мултимедијален комплекс „Connect“ од втората генерација. Тој располага со 7-инчен екран чувствителен на допир и ги поддржува „Apple CarPlay“ и „Android Auto“.
Во опремата на хечбекот се вклучени уште систем за предупредување за опасност од директен судир, систем за контрола на лентата на движење, адаптивен круз-контрол, како и функција за контрола на „мртвите“ зони и за препознавање на сообраќајните знаци.
