Милионерите од сега, ќе можат да патуваат од Лондон до Мелбурн и назад, затоа што во продажба е најскапиот авионски билет на светот кој го нуди компанијата „Etihad Airways“, а чини 14.000 евра.
Тие што ќе купат ваква карта на располагање ќе имаат трособен апартман со личен батлер и кувар. Цената на билетот од Лондон до Мелбурн, го надмина до сега најскапиот билет за авион кој се плаќаше за релацијата Њујорк – Мумбаи, и чинеше околу 12.000 евра. Во авионот Airbus A380 на компанијата „Etihad Airways“, на летот патниците ќе имаат на располагање дневна соба, спална соба и купатило со туш кабина.
Апартманот „The Residence“ е првиот трособен апартман на еден комерцијален лет и и помогна на компанијата да освои бројни награди за патувања од прва класа. Апартманот е со површина од 125 квадратни метри, се наоѓа на горната страна на авионот A380 и е достапен за едно или две лица. Дневната соба е опремена со 32-инчен LCD TV, кауч прекриен со кожа, две трпезариски маси, а обучени батлери служат јадења приготвени од готвачите на авионот. Од ходникот се влегува во спалната соба каде има голем брачен кревет прекриен со дизајнирана италијанска постелнина. На ѕидот е фиксиран 27-инчен LCD TV.
Пред слетувањето патниците ќе можат да се освежат во купатилото каде има туш, огледало за шминка, и фен за коса. Во цената за картата вклучен е и луксузен транспорт до аеродромот, приватен check-in, пристап до приватен салон и лице задолжено за багажот.
„Etihad Airways во моментот има три авиони кои се нарасполагање за лет од Лондон до Мелбурн, така што нашите гости може да уживаат во погодностите и удобностите на летот A380. Тоа е кулминација на долгогодишната работа и огромниот потфат на стотина луѓе“, вели високиот потпретседател за маркетинг на „Etihad Airwaysa“, Шејн О`Харе.
