На нашата трпеза ротквиците обично служат како прилог, односно најчесто ги јадеме како додаток во салатите. Но овие мали пролетни топчиња со лут и горчлив вкус и црвена боја се голем сојузник на здравјето, и треба да се јадат додека се достапни на пазарите.
Заштитник на телото
Ротквицата (лат. Raphanus sativus), во буквален превод значи култивирана зелка, а потекнува од Азија каде се одгледува и консумира уште пред 3.000 години. Црвената боја на ротквицата доаѓа од пигментот антоцијанин. Тој е моќен антиоксиданс кој ги чува клетките на телото од распаѓање и се грижи за здравјето на целото тело.
Поттикнувач на варењето
Лутиот и горчлив вкус на ротквицата го стимулира лачењето на желудечните сокови, поради што обично се служи како салата или пијалок, односно како аперитив кој отвара апетит. Покрај тоа го стимулира варењето и ја поттикнува работата на цревата, а особено им се препорачува на лицата кои имаат проблеми со тврдата столица.
Сојузник на фит формата
Во сто грама ротквици се наоѓаат само 16 калории бидејќи поголемиот дел од составот е вода. Не е ни чудо што во оваа намирница може да уживате бесконечно дури и ако држите диета. Овој вид зеленчук е одличен извор на витамин Ц, диетални влакна, калиум и фосфорна киселина, кои даваат енергија и го зајакнуваат имунолошкиот систем.
Антибактериско „оружје“
Сокот од свежа ротквица порано се користел за лекување на жолчката, а се покажал и како особено корисен во излачувањето на слузта од дишните органи за време на сезонските болести, бронхитис и грип. Некои експерти тврдат дека, покрај нејзините антибактериски својства, таа е и моќно оружје против кашлица и главоболка.
Чувар на црниот дроб
Ротквицата содржи супстанци кои го неутрализираат билирубинот во црниот дроб поради што е одлично средство во борбата против жолтицата. Покрај тоа, таа е одлична намирница за поттикнување на пролетната детоксикација – без разлика дали ја јадете свежа, дали од неа правите сок или ја додавате во напитоци за чистење на организмот од наталожените токсини во телото.
Внимание:
Поради лутината и горчливоста на ротквицата не се препорачува консумирање на големи количини за луѓето кои имаат чувствителна слузница на желудникот и болести како чир, ниту за луѓето со болни бубрези.
