„Unilever“ е подготвен да го пласира на пазарите во САД најновиот „Gold Ice Cream“. Сладоледот е направен од ванила, исполнет со карамела од морска сол и прекриен со белгиско чоколадо со златна боја. „Unilever“ е познат по соработката со модниот свет, откако за прв пат го донесе брендот „Magnum“ на тлото на Америка во 2011 година.
Овој пат го ангажирале дизајнерот Зак Посен, спонзорирајќи го при изработката на гламурен, 24-каратен златен фустан, кој се состои од 10.000 рачно сечени златни ливчиња. На дизајнерскиот тим му беа потребни две недели рачно да го состави фустанот. Овој фустан е проценет на околу 1,5 милиони долари.
Своето деби пред јавноста овој фустан ќе го има на премиерата на краткометражниот филм на „Magnum“ „As Good as Gold“ за време на „Tribec Film Festival“ во средината на април 2013 година, каде што бразилската актерка и модел Каролин Кореа ќе прошета по златниот тепих.
Од „Unilever“ велат гламурот и софистицираноста кои го опкружуваат Посен ги привлекле, бидејќи тој е познат по своите елегантни вечерни тоалети, а самиот дизајнер изјавил дека и фустанот и сладоледот претставуваат сензуалност и луксуз, а самиот фустан имитира течен и сензуален начин на кој се топи сладоледот.