Сегментот на компактни кросовери е високо конкурентен, а во него владеат „Nissan Juke“ и „Renault Captur“. Со цел да биде поразличен моделот на „Toyota“ се обложува на нешто уникатно, што никој друг сличен модел не нуди – хибриден мотор.
Агрегатот е превземен од новата генерација на „Prius“, а развива вкупна моќност од 122 КС. Детални информации недостасуваат, но на моделот „Prius“ системот комбинира 1,8-литарски бензински мотор со моќност од 97 КС и 142 Nm вртежен момент, и електромотор кој развива 73 КС. Просечната потрошувачка на гориво е под 4,5 l / 100 km, а нивото на емисија на „СО2“ е 90 g / km.
На некои пазари хибридот „Prius“ ќе биде достапен со технологијата „E-Four“, што претставува погон на сите четири тркала. Во моментов не е јасно дали оваа опција ќе биде достапна и за „C-HR“.
Сепак е официјално објавено дека 4х4 погон ќе има кај конвенционалните мотори на кросоверот. Меѓу нив е присутен 1,2-литарскиот турбо мотор, кој дебитираше кај „Auris“. Агрегатот развива 115 КС и може да биде во комбинација со мануелна или „CVT“ трансмисија. Се очекува, исто така дизел опција, а на некои пазари (најверојатно надвор од Европа) ќе биде достапен и 2.0-литарски атмосферски мотор.
Што се однесува до дизајнот, во оваа фаза внатрешноста останува мистерија. Тој, сепак, најверојатно е исполнет во склад со надворешноста, која демонстрира различни форми и младешки изглед. „Toyota C-HR“ ќе се нуди само во верзија со 5 врати.
Како што веќе соопштивме, возилото е базирано на платформата „TNGA“ која дебитираше со новата генерација на „Prius“. Производството ќе се одвива во Турција, додека моторите ќе се испорачуваат од фабриката на „Toyota“ во Велс. Продажбата во Европа стартуваат подоцна во оваа година.