Во периодот од 1.1.2015 година до 31.12.2015 година НЛБ Тутунска банка работеше согласно усвоената Деловна политика за 2015 година, прилагодувајќи го тековното работење на економските и пазарните услови во земјата. Банката, во 2015 година, ги оствари сите планирани оперативни и финансиски цели, при што зачувана е високата ликвидност, стабилност и солвентност на Банката.
Во 2015 година, билансната сума се зголемила за 4.392.403 илјади Мкд или за 6,8% и достигна 69.299.762 илјади Мкд.
Порастот беше генериран од растот на депозитите од небанкарскиот сектор коишто се зголемени за 4.711.756 илјади Мкд или за 9,1% и достигнаa 56.705.920 илјади Мкд.
Вкупните кредити кон небанкарскиот сектор се зголемени за 5.278.535 илјади Мкд или за 13,7% и изнесуваат 43.675.150 илјади Мкд.
Во 2015 година, нето каматните приходи беа повисоки за 21,7% во однос на претходната година.
Приходите од камати се зголемија за 1,9% како резултат на повисоки остварени приходи од камата во сегментот население, кои пак се резултат наповисока состојба на кредити, при намалени каматни стапки во однос на минатата година, како и поради повисока состојба на благајнички записи.
Расходите од камати беа пониски за 28,4% како резултат на намалување на каматните стапки на депозитите во текот на годината и пониска состојба на обврски по кредити споредено со 2014 година.
Нето приходите од провизии се намалија за 0,5%.
Приходите од провизии се зголемија за 6,7% поради зголемен обем на работа со картички (зголемен број на картички и зголемен број на трансакции на ПОС терминали), како и поради повисоки остварени приходи од услуги преку деловната мрежа.
Расходите за провизии беа повисоки за 28,8%, главно поради зголемен обем на работа кај картичното работење (зголемување на бројот и вредноста на трансакциите, проширување на мрежата на ПОС терминали, како и пораст на провизијата за меѓубанкарско порамнување), повисоки расходи од платен промет со странство и од кеш центарот.
Останатите некаматни приходи изнесуваат 263.516 илјади МКД и се пониски за 13,3% во однос на претходната година.
Вкупните приходи од работење изнесуваат 3.613.489 илјади МКД и се повисоки за 12,0%.
Вкупните оперативни трошоци изнесуваат 1.724.351 илјади МКД и се повисоки за 6,8%.
Во 2015 година беа издвоени Исправки на вредноста на финансиските средства, на нето основа во износ од 984.447 илјади МКД. Издвоените исправки соодветствуваат на структурата и на квалитетот на пласманите на Банката.
Нето добивката на Банката изнесува 831.951 илјади МКД(13,5 милиони евра) и е повисока за 23,7% во однос на 2014 година.
