Пристигната е една ценовна понуда за приватизација на 67% од капиталот на пристаништето во Пиреја, соопшти грчкиот приватизационен фонд (HRADF) на својата интернет страна. Таа е од компанијата регистрирана во Хонгконг, „Cosco Group“.
Интерес за приватизационата процедура покажаа уште две компании – данската „APM Terminals“, која оперира со пристаништето во Измир, како и филипинската „ICTS“. На крајот и двете компании не поднеле понуди.
Според условите на постапката, сега ќе се одржат преговори за зголемување на ценовната понуда. Кој е предлогот на кинеската компанија, сепак не е наведено.
Според информации на јавната телевизија „ERT“, од „Cosco“ понудиле 400 милиони евра за купување на мнозинскиот удел од пристаништето. Очекувањата на Владата, пак, беа за 1 милијарда евра.
Според поканата за прибирање на понуди, победничката понуда ќе го добие веднаш правото да управува со 51% од капиталот на клучното грчко пристаниште. Останатите 16% ќе му бидат отстапени, ако ја исполни заложбата да вложи 350 милиони евра во модернизација на опремата во наредните пет години.
Договорот за продажба на пристаништето треба да биде ратификуван и од грчкиот парламент.
Ако биде склучен, овој договор ќе биде втората голема зделка за грчката влада по давањето под концесија на 14 регионални аеродроми во земјата.
