Градоначалникот на Охрид Никола Бакрачески во рамки на работната посета на кинескиот град Шенжен, оствари средба со делегација на регионалните власти, предводена од заменикотградоначалник на Шенжен, Ву Јихуан која воедно е и шеф на Секторот за образование, култура, спорт и здравствена политика во локалниот Конгрес на провинцијата.
На средбата било разговарано за можностите за воспоставување долгорочна соработка во делот на образованието преку размена на студенти и професорски кадар, можностите за продолжување на постојната соработка меѓу Охрид и Шенжен во областа на културата, како и за потенцијалите за инвестирање во објекти за здравствен туризам на брегот од Охридското Езеро.
Градоначалникот Бакрачески ги запознал домаќините од Кина со можностите што Владата на Република Македонија и локалната самоуправа на Охрид ги нудат во делот на реализација на странски инвестиции посебно во делот на ИТтехнологиите, лесна незагадувачка индустрија и во делот на градба на луксузни хотелски комплекси.
Охридскиот градоначалник ја искористил посетата на Кина на домаќините да им ја претстави мерката за субвенциите што Република Македонија ги предвидува за туроператорите кои ќе носат странски гости на повеќедневен туристички престој во Македонија. Договорено било преку Амбасадата на Република Кина заедно со локалната самоуправа да се организира групна презентација на туристичката понуда на Охрид за кинеските туроператори и новинари што би се реализирала некаде на почетокот на наредната година.