Американската технолошка компанија „International Business Machines“ (IBM) е блиску до договор за купување на провајдерот на софтвер за облак услуги „HashiCorp“, изјави за „Reuters“ извор запознаен со ова прашање.
Цената на акцијата на „HashiCorp“ се зголеми за 24%, давајќи и пазарна капитализација од 6,1 милијарди долари, откако „Wall Street Journal“ прв објави за разговорите.
Под водство на извршниот директор Арвинд Кришна, „IBM“ се фокусираше на аквизиции за да ги изгради своите понуди за облак услуги. Бумот на генеративната вештачка интелигенција ја зголеми привлечноста на облак софтверот бидејќи помага во обработката на огромни количини на податоци.
„HashiCorp“ со седиште во Калифорнија им овозможува на клиентите да градат и управуваат со нивните инфраструктури во облакот. Годишниот приход на компанијата скокна за 22,5 отсто на 583,1 милиони долари во годината до 31-ви јануари, надминувајќи ја просечната проценка на аналитичарот во тоа време, покажаа податоците на „LSEG“.
Договорот за „HashiCorp“ би можел да биде финализиран во наредните денови, но сепак е можно преговорите да не доведат до договор, пишува „Wall Street Journal“.
„HashiCorp“ одби да коментира за ова прашање за „Reuters“.
„IBM“ заврши девет аквизиции во 2023-та година, вклучително и договор за платформа за управување со трошоци „Apptio“, која ја купи од „Visa Equity Partners“ за 4,6 милијарди долари.
Аквизицијата на „IBM“ на „Red Hat“ во 2018-та година за 34 милијарди долари, вклучувајќи го и долгот, останува нејзина најголема зделка до сега.
