2,9 милијарди евра од помошта која ЕУ ја вети за бегалците кои во моментов се наоѓаат во кампови во Турција, веќе се обезбедени, објавија од Европската комисија (ЕК). За периодот 2016 – 2017-та година беа ветени вкупно 3 милијарди евра.
По договорот со Анкара веќе се потпишани 48 договори во вкупна вредност од 1,6 милијарди евра, а 811 милиони евра од средствата се платени до овој момент. До крајот на 2017-та година ќе бидат договорени и уште 714 милиони евра, дополнуваат од Брисел.
Еден од најважните проекти е во однос на социо-економската поддршка – подобрување на вештините на сириските бегалци и приемните центри во Турција. За овие проекти на бегалците се нудат јазични курсеви и обуки за други вештини. Последниот договор во таа насока е за 50 милиони евра и вклучува обука по турски јазик за бегалците, што ќе им помогне за полесно интеграција на пазарот на труд во земјата.
Европската финансиска помош беше ветена на Турција во 2015-та година. Тогаш двете страни се согласија Анкара да помогне за ограничување на бегалскиот притисок и нелегалната имиграција во Европа. Во замена ЕУ вети финансиска поддршка за обезбедување на подобри услови за бегалците.
Во периодот 2016 – 2017-та година треба да бидат доделени 3 милијарди евра за Турција – 1 милијарда евра од буџетот на ЕУ и 2 милијарди евра од земјите од заедницата.
Освен за подобрување на социјалните вештини на мигрантите, парите се насочуваат и кон подобрување на условите во центрите за сместување.