Петтиот натпревар ќе го даде одговорот кој ќе ја освои шампионската титула во кошаркарскиот шампионат на Македонија, Карпош Соколи или МЗТ, откако „соколите“ славеа во четвртиот меч 86:78 и израмнија на 2-2.
Актуелниот освојувач на Купот, кој беше домаќин на четвртиот меч, одигра одлично прво полувреме, во кое создаде предност од 21 поен, а по две четвртини имаше водство 56:39, но лошата игра на стартот од третата четвртина можеше да го однесе во пораз.
МЗТ успеа да се врати од големата негатива, најпрвин со серија 3:16, а потоа во финишот два пати и да се доближи на само два поени негатива.
Сепак во пенал завршницата непогрешливи беа Пери, Лабовиќ и Трајковски и Карпош успеа да избори победа.
Карпош Соколи, како и на претходниот меч, ги предводеше Пери со 24 поени, додека Мавра и Лабовиќ постигнаа по 11 кошеви. Кај МЗТ со 17 кошеви најпрецизни беа Синовец и Лалиќ.
