Стапката на невработеност во Германија во месец септември падна под шест проценти, бидејќи пазарот на труд во најголемата европска економија остана силен.
Бројот на невработени лица во септември е намален за 76,682 во однос на август, на вкупно 2,61 милиони невработени, се наведува во соопштението на германската Федерална агенција за труд, а пренесува агенцијата АП.
Кога ќе се прилагоди со сезонските фактори, стапката на невработеност се задржала на непроменетите 6,1 проценти.
„За поголемо вработување помогнаа миграциите од проблематичните членки на еврозоната и источна Европа“, изјави економистот на компанијата IHS, Тимо Клајн, додавајќи дека приливот на баратели на азил во 2015 година ќе ја зајакне оваа тенденција во текот на 2016/2017 година, како што се поголем број од нив го стекнуваат правото за престој.
Зголемената имиграција, како што вели, ги промени долгорочните перспективи на Германија, што значи дека работно-способната популација во поскоро време нема да биде намалена.
