Болеста „чвореста“, или „јазлеста кожа“, која се појави кај говедата во Македонија, до денеска, е потврдена во осум општини, при што 12 животни во 10 одгледувалишта манифестирале клиничка слика, а 235 се афектирани, соопшти директорот на Агенцијата за храна и ветеринарство (АХВ) Зоран Поповски.
Според Поповски, покрај усмртувањето и нештетното отстранување на заболените грла, превентивно се формирани и заштитни зони со радиус од три километри околу жариштата каде болеста е потврдена, зони под надзор со радиус од 10 километри околу жариштата и зони под ограничување во радиус од 50 километри околу жариштата.
„Болеста „јазлеста кожа“ е локализирана во источна Македонија и е ставена под контрола во сите осум општини каде што е потврдена, Демир Капија, Штип, Василево, Босилово, Радовиш, Струмица, Ново Село и Делчево. Но, поради начинот на нејзиното релативно лесно и брзо пренесување со инсекти (мушички, комарци, муви,…) не е исклучено натамошно ширење“, истакна Поповски, при што нагласи, можно е до крајот на месецот да бидат афектирани три илјади животни.
Сепак, потенцира Поповски, секоја прогноза за ширење на болеста би била шпекулација со оглед на начинот на пренесувањето, моментно потпомогнат и од временските услови.
Тој ги отфрли констатациите за наводно ненавремено реагирање од страна на државата, затоа што рече, по добиените сознанија за појавата на „јазлеста кожа“ во соседните земји, реагирале веднаш и порачале вакцини, кои треба да пристигнат до крајот на месецот, а се чека зашто оваа компанија е единствен производител во светот.
Одговорајќи на новинарски прашања, информира дека забраната за дистрибуирање млеко и месо која досега важеше за афектираните подрачја, сега се однесува само на одгледувалиштата каде болеста е потврдена.
„Млекото и месото ќе може да се предаваат во заштитните зони, но со одреден надзор. Болеста и млечните и месните производи воопшто не се опасни за здравјето на луѓето“, рече Поповски, а забраната и останатите вакви мерки се воведени само заради спречување на ширењето на болеста, не и затоа што овие производи се штетни.
Обесштетувањето на сточарите, пак, ќе се врши веднаш штом сопственикот на усмртените грла поднесе соодветно барање, а исплатата ќе биде реализирана во најкраток можен рок, со пари од буџетот на АХВ.
Болеста „јазлеста кожа“ е типична за африканскиот континент и досега се сметаше за егзотична, но од минатата година, со поместување на некои температурни граници, поволни за векторите (преносители), преку Блискиот Исток се прошири во Турција, а од таму во Грција и Бугарија. Овие две земји засега бројат по околу 7.000 афектирани грла. Болеста е многу присутна и во Израел.
Во Македонија „јазлеста кожа“ се појави и беше откриена на 18 април, а потврдена на 21 април годинава.
