На саемот за автомобили во кинескиот град Гуанџу, „Kia“ го изложи концептот „KX3“ со кој најавува влез на пазарот на под-компактни кросовери.
По „Hyundai“, кој во Кина го претстави малиот „SUV“, „ix25“, и вториот голем корејски производител ја прикажа својата верзија на кросовер од истиот сегмент.
Концептот на „Kiа-KX3“ најавува како би требало да изгледа нивниот мал спортски теренец во оваа растечка класа на кинескиот автомобилски пазар.
„KX3“ нема типичен дизајн на „Kiа“, иако има препознатлива маска на ладилникот и стоп светла. Автомобилот е долг 4.260 mm, широк 1.760 mm, a висок 1.630 mm, додека меѓуосовинското растојание изнесува 2.590 mm. Багажникот има корисна зафатнина од 400 литри, со исправени наслони на задните седишта.
Автомобилот е придвижуван од 1.6-литарски турбо-бензински мотор со директно вбризгување на гориво (T-GDI), кој е поврзан со седум степен менувач со двојно квачило (DCT).
Моќта на моторот се пренесува на сите 4 тркала, што овој кросовер го прават употреблив и за теренско возење.
Во „Kiа“ велат дека конструкцијата на „KX3“ е направена со цел да освојат максимални 5 ѕвезди според кинеските безбедносни стандарди, „C-NCAP“, a поради подобрата пасивна безбедност зголемена е употребата на челик со голема цврстина.
Концептот „KX3“ е направен исклучиво за кинескиот пазар, а од „Kiа“ засега не потврдија дали и кога ќе започне сериското производство на овој автомобил.