Компанијата „Kellogg“, која ги произведува „Corn Flakes“ и „Rice Krispies“, е во финална фаза на преговорите за купување на производителот на „Diamond Foods“ за повеќе од 1,5 милијарди долари, пишува „New York Post“, повикувајќи се на анонимни извори.
„Kellogg“ може да плати меѓу 35 и 40 долари по акција на „Diamond“, додава весникот. Засега и двете компании одбиваат да коментираат во врска со ова прашање.
„Diamond Foods“ го произведува чипсот „Kettle“, како и пуканките „Pop Secret“. Компанијата ја ангажираше „Credit Suisse“, која ги испитува можностите за продажба, пренесува „Ројтерс“.
Компанијта со седиште во Сан Франциско, „Diamond“, се обидува безуспешно да ја зголеми продажбата во оваа година. Нејзините приходи не ги оправдаа прогнозите на аналитичарите во последните четири квартали, а во 2015-та година компанијата излезе од бизнисот со производи од ореви, бидејќи не беше профитабилен.
Во меѓувреме „Kellogg“ се обидува да го прошири својот бизнис со грицки преку превземања и да го зголеми меѓународното присуство, бидејќи во САД опаѓа продажбата на житни закуски.
„Kellogg“ ја купи египетската компанија „Bisco Misr“ во јануари и склучи договор за дистрибуција, па да го прошири својот делокруг во Африка.
Најголеми акционери во „Diamond“ се хеџ фондот „Oaktree Capital Management“ (14% удел) и „BlackRock Institutional Trust“ (близу 7% удел).
