Целосно нова генерација на „MINI Cabrio“ претстави култната британска марка, која е дел од „BMW Group“. Автомобилот е изграден на нова платформа, нуди практична кабина и нова палета на бензински и дизел мотори.
Димензиите на новото „MINI Cabrio“ структурирано според платформата „UKL“, се зголемени во споредба со претходниот модел за 98 мм во должина, за 44 мм во ширина и за 7 мм во висина. Меѓуоскиното растојание е зголемено за 28 мм, а тоа влијаеше поволно на просторот во кабината и на багажникот, чиј обем веќе достигнува 215 литри со затворен покрив и 160 литри со отворен, или за 25% повеќе од порано.
Редизајниран е и покривот, кој е мек и може да биде отворен или затворен за само 18 секунди при брзина до 30 км/час.
Во однос на погонот, новиот модел нуди богата гама на бензински и дизел агрегати. При воведувањето на пазарот „MINI Cabrio“ ќе може да се опреми со 1,5-литарски трицилиндарски бензински мотор со 136 КС, како и со моќниот четирицилиндарски бензински мотор со 192 КС и волумен од 2,0 литри. Дизелот „MINI Cooper D Cabrio“ исто така користи трицилиндарски мотор, а моќноста му е 116 КС.
Верзијата со 136 КС и 220 Нм има просечна потрошувачка на гориво од 5 л/100 км, а забрзува од место до 100 км/час за 8,8 секунди (со автоматски менувач: 8,7 секунди). Кај „MINI Cooper S Cabrio“ забрзувањето трае 7,2 секунди (автоматски менувач: 7,1 секунди), а потрошувачката е во рамките на 6 л/100 км, покажува информацијата. Најекономичен е дизел модел во кој потрошувачката е под 4 л/100 км, но забрзувањето до „стотка“ трае 9,9 секунди.
Во подоцнежна фаза во палетата ќе бидат додадени уште мотори – 1,2-литарски со 101 КС за верзијата „One“, 2,0-литарски дизел со 168 КС за верзијата „Cooper SD“, како и 2.0-литарски бензински со 228 КС за максималната модификација „John Cooper Works“ (JCW).
Сериски сите понудени мотори за новиот „MINI Cabrio“ се комбинираат со новиот шестбрзински мануелен менувач, а како опција се нуди шестбрзински менувач „Steptronic“. Исто така е достапен и шестбрзински менувач „Steptronic Sport“, која префрла побрзо и ја има функција „Launch Control“ за оптимизирано забрзување од место. Кај возилата опремени со систем за навигација, управувањето на преносот се прилагодува на профилот на трасата.
