Германската воздухопловна компанија „Lufthansa“ ја унапреди својата класа за деловните луѓе, така што на многубројните прекуокеански летови сега има ресторанска услуга во која патниците ги послужуваат лични стјуарди и стјуардеси.
Во понудата се вклучени авионите од типот „А380“ на летовите од Франкфурт кон Њујорк, Лос Анџелес, Мајами, Хјустон, Сан Франциско, Њу Делхи, Пекинг, Шангај, Сингапур, Сеул и Јоханесбург, и секако во обратна насока.
Од 1-ви октомври годинава понудата ќе биде проширена и на авионите „Boeing 747“ на летовите од Франкфурт, а од 25-ти октомври и на воздухопловите „A340“ од Франкфурт и до Минхен кон Азија и Блискиот исток.
Новата услуга веќе била тестирана во деловната класа на 130 летови.
Станува збор за одговор на компанијата „Lufthansа“ на сличните услуги на арапските компании, како „Fly Emirates“ и „Etihad“. Целта на германската компанија е да стане првиот авиопревозник со „пет ѕвездички“ во Европа или Северна Америка.
