Францускиот телеком „Altice SA“ стекнува контрола над американскиот кабелски оператор „Suddenlink Communications“ за 9,1 милијарди долари. Со договорот, милијардерот со француско и израелско државјанство, Патрис Драи прави прв обид за влез на американскиот пазар, пишува „Bloomberg“.
Инвестициска компанија на Драи купува 70% од капиталот на седмиот по големина кабелски оператор во САД. Освен тоа „Altice“ упатува понуда за стекнување на „Time Warner Cable Inc.“, откако пред еден месец понудата на „Comcast Corp.“ беше повлечена, изјави за агенцијата лице кое е запознаено со случувањата.
51-годишниот Драи бара начини да ја прошири телекомуникациската империја на американскиот кабелски пазар кој брзо беше преоформен по серијата договори за спојувања и превземања. Кабелските оператори се обидуваат да станат поголеми, откако нивниот традиционален бизнис со телевизиски услуги е под притисок на онлајн конкурентите.
Во април најголемиот кабелски оператор во САД – „Comcast“, се откажа од купувањето на вториот по големина „Time Warner Cable“ поради регулаторни пречки. Освен тоа четвриот по големина „Charter Communications Inc.“ работи на стекнувањето на шестиот по големина „Bright House Networks LLC.“. Голем број аналитичари очекуваат спојување меѓу „Charter“ и „Time Warner Cable“.
Зделката ја проценува „Suddenlink“ на 9,8 пати од проценетата добивка за 2015-та година, или 27% повеќе од просекот на трансакции во секторот во 2014-та година, покажуваат податоците на „Bloomberg Intelligence“. Вредноста на зделката во акции е околу 1,7 милијарди долари, со што пазарната проценка за учеството на „Suddenlink“ изнесува 9,1 милијарди долари.
Со седиште во Сент Луис, „Suddenlink“ располага со речиси 1,5 милиони клиенти и развива активност во голем број држави, меѓу кои, главно во Тексас, Оклахома, Арканзас, Луизијана, Северна Каролина и Западна Вирџинија.
Договорот за „Suddenlink“ ја обележува едвај втората промена во сопственоста на американската компанија за три години. Во 2012-та година таа беше купена од „ВC Partners Ltd.“ и Канадскиот пензиски фонд за 1,99 милијарди долари од група инвеститори, меѓу кои и „Goldman Sachs Group Inc.“, „BC Partners“, Канадскиот фонд и „CPP Investment Board“ кои ќе задржат 30% од „Suddenlink“.
Минатата година „Altice“ го купи францускиот провајдер за безжичен интернет „SFR“ и го спои со својот кабелски оператор „Numericable“. Претходно оваа година се појавија гласини дека „Altice“ има намера да го купи малиот мобилен оператор „Bouygues Telecom“, но од компанијата ги демантираа гласините.
