По заминувањето на Перо Моцан, на почетокот од мај за нов извршен директор на „Винарија Сковин АД“ е назначен Тодор Сејзов, дипломиран економист со долгогодишно искуство на управувачката позиција директор на продажба во Лотарија на Македонија.
Тодор Сејзов нов извршен директор на Винарија Сковин
„Новата функција е уште еден нов, голем предизвик во мојата професионална определба. Македонија има огромен потенцијал за развој на винскиот сектор како во рамките на нашата земја така и во регионот па и пошироко. Секако дека Сковин е веќе докажан бренд и подолг период извезува вино во Европа, Русија, Јапонија и Канада“, изјави Сејзов по назначувањето на челната функција во винаријата.
Како свој приорите го истакна пробивањето на нови пазари и запознавањето на културата и навиките на тамошното население што на „Сковин“ како компанија „ни дава дополнителен стимул и желба за работа и адаптирање на нашиот финален производ во согласност со барањата и потребите на крајниот конзумент“.
„Во моментов сме во преговори за проширување и освојување на поголем дел од кинескиот пазар. Во однос на домашниот пазар новина е соработката со нашиот нов дистрибутер Гемак, а исто така и морам да споменам дека Сковин АД во целост ги исплати лозарите и со тоа ја испочитува законската обврска за откуп на грозјето предвидено до 30-ти април“, дополни Сејзов.
Новиот извршен директор на „Сковин“ потенцираше дека тимот на винаријата е предводен од професионални енолози кој „секогаш успева да понуди нови и квалитетни вина“,
„Во контекст на ова ќе го споменам последното пенливо вино ‘Сковин Пенливо’ кое го лансиравме на пазарот непосредно пред новогодишните празници. ‘Сковин Пенливо’ е добиено со примена на класична метода на производство што му дава врвен квалитет и неодолив вкус. Иновативноста на Сковин секогаш била нејзина предност, впрочем ние бевме првата винарија која излезе со брендирана ракија и првото пенливо вино, од 2003 година.)“, рече Сејзов.