Компанијата „Twitter“ во првото тромесечје од годината оствари загуба од 162 милиони долари, поради што цената на акцијата на социјалната мрежа потона за 18 отсто, иако нејзините приходи бележат силен пораст.
Според деловниот извештај, објавен во вторникот, приходите на „Twitter“ достигнаа во претходниот квартал 436 милиони долари, наспроти 250 милиони во истиот период лани. И покрај силниот, 74-отстотен раст на приходите, резултатот е сепак послаб од предвидувањата на аналитичарите.
Притоа загубата е зголемена на 162 милиони долари, додека во првиот квартал од минатата година изнесувала 132 милиони.
Бројот на активни месечни корисници на „Twitter“ на годишно ниво е зголемен за 18 отсто, на 302 милиони.
„Twitter“, кој на корисниците им овозможува испраќање на пораки до 140 карактери, е меѓу најпознатите социјални мрежи на светот, а го користат бројни политичари, познати музички и филмски ѕвезди, активисти, спортисти…
Сепак, компанијата не успева да расте толку брзо како „Facebook“, најголемата социјална мрежа на светот со околу 1,44 милијарди корисници.
