Најголемата светска услужна нафтена компанија „Schlumberger“ извести за остар пад на приходите и добивките во текот на првото тримесечје од годинава и најави укинување на уште 11.000 работни места, подготвувајќи се за подолг период на послаби активности и притисок на цените на нафтата.
Приходите „Schlumberger“, американската компанија којашто изнајмува технологија и опрема за црпење нафта на нафтените и гасните компании, паднале во првиот квартал од 2015-та година за 9 отсто во однос на истиот период минатата година, на 10,25 милијарди американски долари. Тоа е последица, како што се наведува во деловниот извештај на компанијата објавен во четвртокот навечер, на намалените активности и инвестициите во истражувањето и црпењето на нафтата, како и притисокот врз цените.
Добивката на „Schlumberger“, пак, паднала во изминатиот квартал 38,8 отсто во однос на истиот лански период на 975 милиони долари.
Бидејќи се заканува и ризикот од натамошниот пад на цените на нафтата, кои во однос на јуни 2014-та година потонаа за околу 50 отсто, компанијата најави и намалување на инвестициите. А само до пред извесно време планираше во текот на 2015-та година да инвестира 3 милијарди долари, меѓутоа сега овој план го намали на 2,5 милијарди долари.
Поради зголемената понуда на нафтата во однос на побарувачката на светските пазари, се очекува и продолжување на трендот на намалување на производството и инвестициите во нафтениот сектор, особено во САД, па од „Schlumberger“ најавија и натамошно намалување на трошоците на работењето.
Откако неодамна најавија укинување на 9.000 работни места, во четвртокот најавија отпуштања на уште 11.000 работници. Така „Schlumberger“ во 2015-та година ќе им даде отказ на вкупно 20.000 работници, односно на 15 отсто од вкупно вработените во компанијата.