Натпреварот кој ќе го одреди носителот на Суперкупот на Италија, ќе се одигра во Катар. Ова го објави директорот на „Серија А“, Маурицио Берета. Средбата е закажата во пресрет на католички Божиќ, поточно на 22-ри декември.
За овој пехар ќе се соочат шампионот Јувентус и носителот на Купот на Италија од минатата сезона Наполи. Веста беше објавена во Париз во присуство и на претседателот на катарската федерација Сауд ал Моханади.
Првично беше најавено дека натпреварот ќе се одигра во Милано на „Сан Сиро“ на 23-ти декември. Официјално арапската страна предложила поволни финансиски услови за да може натпреварот да се одигра во Доха. Договорот е само за оваа година.
За Италијанската федерација не е преседан да ја дава организацијата на овој натпревар во други земји. Во 2009-та, 2011-та и 2012-та година домаќини беа Либија, САД и Кина.