Спојување на двата најголеми американски производители на цигари

Американскиот производител на цигари „Reynolds American (RAI)“ планира да ја купи ривалската компанија „Lorillard“ за повеќе од 25 милијарди долари, што ќе доведе до спојување на двете најстари и најголеми американски производители на цигари.

Со здружувањето на „Reynolds American“ и „Lorillard“, односно вториот и трeтиот најголем американски производител на цигари, ќе биде создадена компанија со вкупни приходи од повеќе од 11 милијарди долари и со оперативен профит од околу пет милијарди долари, се наведува во заедничкото соопштение на компаниите, пренесува агенцијата Франс прес.

„RAI“ е мајка-фирма на компанијата „RJ Reynolds“, производител на цигарите „Camel“, „Pall Mall“ и „Winston“, додека брендот на „Lorillard“, „Newport“ е најпродаваниот бренд на ментол цигари и вториот најпродаван вид на цигари во САД.

Компанијата „RAI“, исто така, најави дека британската компанија „Imperial Tobacco“ ќe ги купи нејзините брендови на цигари, како „Salem“ и „Winston“ и некои други средства за сума од 7,1 милијарда долари.

„British American Tobacco“, најголемиот акционер во „RAI“, ги поддржа ваквите договори и соопшти дека ќе го задржи својот удел од 42 проценти преку инвестиции од околу 4,7 милијарди долари.