Првите фотографии од концептот „Volkswagen Amarok Power“ се појавија на интернет пред официјалното претставување кое ќе се случи за време на манифестацијата „Wörthersee 2014“.
Новиот модел практично е идентичен како минатогодишниот концепт „Amarok Power Pickup“, а го карактеризира нова опрема за каросеријата, како и сет масивни алуминиумски тркала. Тука се и „LED“ предните светла, црните и портокалови линии на каросеријата, како и двојниот издувен систем.
Спортскиот дизајн продолжува во кабината и подразбира кожни навлаки на седиштата, спортски волан, како и атрактивна централна конзола со компоненти изработени од јаглеродни влакна.
Се претпоставува дека за моќта ќе биде задолжен 3.0-литарски„TDI V6“ мотор кој постигнува 272 ks излезна моќ и 600 Nm вртежен момент, т.е. овој мотор ќе биде поврзан со осумстепена автоматска трансмисија и „4MOTION“ погонот на сите четири тркала, што му овозможува забрзувањето до 100 km/h да го постигне за 7.9 секунди.
