Напаѓачот на Ливерпул, Луис Суарез е прогласен за најдобар играч на сезоната во Англија во рангирањето на Здружението на англиските професионални фудбалери.
27-годишниот Уругваец на своето конто засега има 30 гола и 12 асистенции во сезоната, во која Ливерпул води на табелата на два круга пред крајот.
„Премиер лигата е полна со одлични фудбалери, па поради тоа за мене е голема чест кога овие играчи ти го ценат трудот на теренот“, коментира Суарез.
Тој во анкетата ги претекна соиграчите Стивен Џерард и Даниел Стариџ, халфот на Челзи Еден Азар, Јаја Туре од Манчестер Сити и Адам Лалана од Саутемптон.
Белгискиот репрезентативец Азар беше избран за најдобар млад играч до 23 години. Шестмината номинирани се ставени во тимот на сезоната во Премиер лигата, а кон нив се приклучија Петер Чех и Гери Кејхил (Челзи), Винсент Компани (Манчестер Сити ), Лук Шо (Саутемптон) и Шејмс Колман (Евертон).
Награди на годишната листа на Здружението на англиските професионални фудбалери:
* играч на сезоната во Англија : Луис Суарез (Ливерпул)
* тим на сезоната во Премиер лигата: Петер Чех (Челзи) – Шејмс Колман (Евертон), Гери Кејхил (Челзи), Винсент Компани (Манчестер Сити), Лук Шо (Саутемптон) – Јаја Туре (Манчестер Сити), Стивен Џерард (Ливерпул), Адам Лалана (Саутемптон), Еден Азар (Челзи) – Луис Суарез (Ливерпул), Даниел Стариџ (Ливерпул)
