Фудбалскиот клуб Барселона нема да го гради планираниот нов стадион за 1.2 милијарди долари, каква што беше идеата на раководството. Ова го откри градоначалникот на каталонската престолнина Шавиер Тријас. Тој имал разговор со претседателот на Барса, Сандро Росел, кој го информирал дека клубот ја преферира варијантата да се реновира „Ноу Камп“.
„Овој стадион е дел од нашата колективна меморија, тој е најголемиот во Европа. Не сакаме членовите, поддржувачите и симпатизерите на Барса да доживеат огромен финансиски товар, што е неизбежно со проектот за нов стадион. Затоа избравме реконструкција“, објасни претседателот Сандро Росел.
Според прогнозите реконструкцијата на „Ноу Камп“ ќе чини околу 750 милиони долари. Стадионот ќе биде целосно покриен, а не како досега, само 20 проценти од местата се со покрив. Капацитетот на објектот ќе биде зголемен од 98.000 на 105.000 , а освен тоа ќе бидат изградени, Кошаркарска сала и нови ресторани. Работата на проектот треба да започне во 2017-та година и да трае до 2021-ва година, а во тој период нема да има никаква пречка тимот да продолжи да ги игра натпреварите на „Ноу Камп“.