Компанијата „Samsung Electronics“ планира да објави план за враќање на вредноста кон акционерите во износ поголем од 100 трилиони вони (72 милијарди долари), објави јужнокорејскиот весник „MoneyToday“, повикувајќи се на неименувани претставници од индустријата.
Информацијата доаѓа еден ден откако конкурентот „SK Hynix“ објави рекордно откупување на сопствени акции.
Според наводите, компанијата планира да користи 50 отсто од својот слободен паричен тек за враќање на средства кон акционерите, при што се очекува мерките главно да се однесуваат на исплата на дивиденди во готовина, објавува „Bloomberg“.
Овој сооднос е сличен на делот од капиталот што конкурентот „SK Hynix“, кој оваа недела најави сопствена програма за откуп на акции вредна 40 трилиони вони, планира да им го распредели на акционерите до 2027-ма година.
Од „Samsung“ во текстуална порака соопштија дека немаат коментар за овие наводи, повикувајќи се на изјава на главниот финансиски директор за време на разговорот со инвеститорите по објавувањето на финансиските резултати во јули.
„Наскоро ќе споделиме план за наоѓање оптимален баланс меѓу максимизирањето на вредноста за акционерите и реинвестирањето во идниот раст, истовремено максимизирајќи го приносот за акционерите“, изјави тогаш главниот финансиски директор Парк Сунчеол.
Акциите на „SK Hynix“ во четвртокот во Сеул поскапеа за 13 отсто по објавувањето на планот, додека акциите на „Samsung“ во текот на денот достигнаа раст од повеќе од 10 отсто.
Овие движења следуваат по период на зголемена нестабилност на берзата минатиот месец, кој го стави на тест растот поттикнат од вештачката интелигенција и отвори прашања за неговата одржливост.
„Очекуваме иницијативата да послужи како значајна поддршка за цената на акциите, обезбедувајќи конкретна заштита од пад во краткорочен период“, наведоа од „Citigroup“ во анализа посветена на плановите на „SK Hynix“.
Од „Citigroup“ додаваат дека одлуката претставува јасен показател за „довербата на раководството во среднорочните и долгорочните перспективи на пазарот на мемориски чипови“.
Плановите за враќање средства кон акционерите ја нагласуваат довербата на производителите на чипови дека имаат доволно финансиски капацитет да ги поддржат своите акции, истовремено продолжувајќи да ги финансираат големите инвестиции потребни за искористување на растечката побарувачка поттикната од вештачката интелигенција.
