„Fiat“ објави нови фотографии од два компактни теренски возила кои ќе се појават на глобалните пазари до крајот на годината, додека продажбата во Европа ќе започне во втората половина на 2026-та година.
Новите модели ќе бидат поголеми и попространи од „Grande Panda“, а „Fiat“ ги гледа како директни конкуренти на теренскиот модел „Dacia Bigster“.
Класичниот „Grizzly“ е наменет за семејства и купувачи кои даваат приоритет на просторот и практичноста, додека „Grizzly Fastback“ носи поспортски изглед со наклонета линија на покривот.
И двата модели се долги помалку од 4,5 метри и се базираат на механичката платформа „Stellantis Smart Car“, која веќе ја користат „Fiat Grande Panda“, „Citroen C3 Aircross“ и „Opel Frontera“.
Иако фотографиите од ентериерот сè уште не се објавени, „Fiat“ ветува пространа кабина, голем багажник и модерни технологии кои ќе го олеснат секојдневието.
Понудата на погонски склопови ќе биде широка. Купувачите ќе можат да избираат помеѓу бензински, блага хибридна и целосно електрична верзија.
Се очекува да го користи познатиот 1,2-литарски мотор, како и електричниот погон што веќе го користат другите модели од групацијата „Stellantis“.
„Grizzly“ и „Grizzly Fastback“ ќе се продаваат во Европа, Блискиот Исток, Африка и Латинска Америка, а во некои региони би можеле да ја преземат улогата на наследник на моделот „Fiat Tipo“.
Првиот човек на „Fiat“, Оливие Франсоа, изјави дека новото семејство SUV претставува продолжение на стратегијата на брендот за враќање во сегментот на прифатливи семејни автомобили, со фокус на практичност, модерен дизајн и конкурентна цена.
