Американскиот банкарски гигант „JPMorgan Chase“ лансира свој дигитален токен сличен на стабилна валута наречен „JPMD“, објави „CNBC“.
Се очекува таканаречениот депозитен токен да биде лансиран на блокчејнот „Base“ на „Coinbase“, изграден на мрежата „Ethereum“. Секој депозитен токен ќе биде дигитален еквивалент на депозит во комерцијалната банка.
„JPMD“ ќе им понуди на клиентите 24-часовно порамнување, како и каматни плаќања на неговите сопственици. Засега, алатката ќе биде достапна само за институционалните клиенти на „JPMorgan“ – за разлика од многу стабилни монети, кои се генерално достапни за пошироката јавност.
„Предвидуваме институциите да го користат ‘JPMD’ за решенија за порамнување на дигитални средства преку синџир, како и за прекугранични трансакции од бизнис до бизнис“, изјави за „CNBC“ Навин Малела, ко-раководител на „Kinexys“, блокчејн гранката на „JPMorgan“.
„Со оглед на тоа што депозитните токени наскоро потенцијално ќе носат и камата, ова ќе обезбеди подобра заменливост со постојните депозитни производи што институциите моментално ги користат“, рече тој.
„JPMorgan“ вели дека предностите од лансирањето на депозитен токен во споредба со стабилната валута се тоа што им дава на институционалните клиенти начин побрзо и полесно да ги движат своите пари, а сепак да одржуваат блиска врска со традиционалниот банкарски систем.
Во САД, стабилните монети остануваат во голема мера нерегулирани. Сепак, ова ќе се промени откако Сенатот го усвои таканаречениот „GENIUS act“, кој ќе обезбеди рамка за регулирање на овие токени.
Во Европската Унија, регулирањето на стабилните монети спаѓа во рамките на законот „MiCA“, додека во Велика Британија, плановите за крипто-индустријата сè уште се подготвуваат.
