Данската фармацевтска компанија „Novo Nordisk“ очекува нејзината продажба повторно да порасне оваа година поради зголемените залихи на неговите лекови за третман на дебелина „Ozempic“ и „Wegovy“.
Приходите на производителот на лекови веројатно ќе пораснат од 16% до 24%, соопшти компанијата. За споредба, лани пораснале за 26%.
Финансискиот извештај на „Novo“ за четвртиот квартал од 2024-та година ја врати довербата во изгледите на фармацевтската компанија по неколкумесечна загриженост за нејзината способност да се натпреварува со „Eli Lilly & Co“.
Продажбата на „Wegovy“ на „Novo Nordisk“ продолжува да расте. Графикон: „Bloomberg“
Оперативната добивка скокна за 37% на 36,7 милијарди дански круни (5,123 милијарди долари), што ги надмина прогнозите на аналитичарите од 33,6 милијарди круни (4,7 милијарди долари).
И „Ozempic“ и „Wegovy“ се во голема мера одговорни за ова. Глобалната побарувачка за двата производи ја претвори компанијата во гигант во матичната земја, а таа самата почна да има видливо влијание врз националната економија. Но, разочарувањата од клиничките испитувања и загриженоста за ценовните притисоци во САД влијаеа врз акциите во последниве месеци.
Компанијата сигнализираше дека ќе продолжи да се бори да ја задоволи побарувачката оваа година, предвидувајќи „континуирани периодични ограничувања на понудата“ и недостиг на лекови.
Резултатите на „Novo“ се во спротивност со разочарувачкиот четврти квартал на „Lilly“, производителот на лекови за дијабетес и дебелина „Zepbound“ и „Mounjaro“. Минатиот месец американската фармацевтска компанија објави раст на продажбата што не ги исполни очекувањата на инвеститорите.
