„Adidas AG“ објави подобри од очекуваните квартални резултати во услови на бум на ретро моделите на патики како „Samba“, објави „Bloomberg“.
Германската компанија за спортска облека оствари оперативна добивка од 57 милиони евра во четвртиот квартал од 2024-та година, покажаа прелиминарните податоци од средата. Ова резултираше со оперативен профит за цела година од 1,3 милијарди евра, што ја надминува прогнозата на компанијата направена во октомври.
Наспроти оваа позадина, извршниот директор Бјорн Гулден ги придобива инвеститорите со враќање на основите на спортот и развој на нови чевли и облека. Тој се надева дека ќе го затвори јазот со водечкиот во индустријата „Nike Inc“.
И покрај макроекономската несигурност, „Adidas“ соопшти дека сè уште има за цел да постигне двоцифрен раст на продажбата и да го зголеми својот оперативен профит. Компанијата ќе ги објави своите конечни резултати на 5-ти март, заедно со финансиските насоки за 2025-та година.
„Гледаме потенцијал да го зголемиме нашиот удел на сите пазари“, изјави неодамна Гулден.
Брендот вети дека ќе се врати на раст во 2024-та година по неубедливата 2023-та година, кога компанијата настрада од откажаното партнерство за чевли „Yeezy“ со раперот и дизајнер Канје Вест.
„Adidas“ расте во сите свои региони и поделби, при што потрошувачите и трговците на мало покажуваат зголемен интерес и за спортски производи и за производи за начин на живот, соопшти компанијата. Побарувачката за класични модели на патики, вклучително и „Samba“, „Spezial“ и „Campus“, и помогна на германската компанија да ја врати наклонетоста кај партнерите за малопродажба, соопшти „Adidas“.
