Вработените во „Volkswagen“ ќе штрајкуваат, бидејќи синдикалните лидери и германскиот производител на автомобили не успеаја да се договорат како да ги намалат трошоците во услови на ладење на пазарот на електрични возила и жестока конкуренција, објави „Wall Street Journal“, повикувајќи се на претставник на синдикатот „IG Metall“.
Портпаролот на работната организација рече дека вработените ќе почнат со предупредувачки штрајкови во понеделник, со кои членовите ќе ја напуштат работата неколку часа на ден. Времетраењето на штрајкот ќе зависи од тоа како ќе напредуваат преговорите, додаде портпаролот.
Volkswagen обезбедува работа за околу 300.000 работници во Германија и управува со 10 погони во земјата. Штрајкувачките акции погодуваат околу 120.000 вработени во фабриките во Волфсбург, Брауншвајг, Хановер, Салцгитер, Емден и Касел, како и објекти на одредени подружници.
Во саботата истече клаузулата во договорот меѓу синдикатот и работодавачот, со која се забранува штрајк.
Последната рунда преговори меѓу „Volkswagen“ и „IG Metall“ заврши без договор, а разговорите ќе продолжат на 9-ти декември.
„Volkswagen“ не одговори на барањето на „WSJ“ за коментар.
Групата е во спор со синдикатот со недели бидејќи се обидува да спроведе намалување на трошоците во својот локален бизнис во обид да стане поконкурентна.
Производителите на автомобили се мачат во последниве месеци поради слабиот пазар на електрични автомобили и силната конкуренција од кинеските концерни, што поттикна многу европски компании да ги преиспитаат своите стратегии. Неколку од нив го намалија својот профит и насоките за работни места за оваа година.
Претставник на работниците на „Volkswagen“ рече дека групацијата се подготвува да затвори најмалку три фабрики во Германија, да укине десетици илјади работни места и да ги намали платите на работниците за 10 отсто во обид да ги намали трошоците.
Минатата недела, извршниот директор на брендот „Volkswagen“, Томас Шефер, рече дека нема начин да се избегнат отпуштања и затворања на фабрики бидејќи компанијата се обидува да ги намали трошоците за 4 милијарди евра.
„На крајот на краиштата, секое решение мора да ги намали и прекумерниот капацитет и трошоците. Не можеме само да користиме фластер и да продолжиме да се влечеме“, вели Шефер.
Тој рече дека повеќето од планираните кратења на работните места во германскиот производител на автомобили, кои групата не ги квантифицираше, може да се направат преку предвремено пензионирање и необновување на истечените договори.
Но Шефер истакнува дека тоа нема да биде доволно.
„Ќе биде потребно многу време. Нема смисла да се одложува реструктуирањето до 2035-та година. Дотогаш нашата конкуренција ќе не надмине“, посочува тој, додавајќи дека реструктуирањето на „VW“ треба да се случи во рок од 3-4 години.
