Доналд Трамп еднаш се опиша себеси како „Господин Брегзит“. Но, дали неговото враќање во САД може да го прекине Брегзит?
Трговските политики на новоизбраниот американски претседател, обединети под мотото „Америка на прво место“, го комплицираат обидот на Велика Британија да се сврти кон глобалната слободна трговија, пишува „Politico“. Неговиот однос кон Украина и НАТО ги загрижи и политичарите од двете страни на Каналот.
За многу политичари во Брисел кои беа вклучени во обликувањето на односите меѓу Европската унија (ЕУ) и Британија, резултатите од изборите во САД минатата недела значат само едно: зајакнување на врските меѓу малку отуѓените соседи.
Оние кои се залагаат за Брегзит во Британија, исто така, очигледно се загрижени дека новиот американски претседател би можел да ја турне нивната земја назад во прегратките на Брисел. Новиот лидер на конзервативците Кеми Баденох ја повика владата да не му врти грб на Вашингтон, истакнувајќи дека „лабуристите не се грижат за ништо друго освен за ЕУ“.
Таа ги повика министрите да гледаат подалеку од реториката на Трамп и да се осврнат на неговите „историски и семејни врски со ОК“.
Секако, постои апетит за поблиски односи меѓу ОК и ЕУ. Според претставник на ЕУ, враќањето на Трамп ги натерало нивните колеги да гледаат кон Ла Манш со надеж. Одговорот на политиката на Трамп беше масивни инвестиции во одбраната и склучување нови безбедносни договори со трети земји. Обединетото Кралство е на врвот на оваа листа на земји.
Дипломат од Брисел под услов да остане анонимен коментира дека има „политичка логика“ во таквото зближување. „Претпоставувам дека поддршката за Украина ќе биде првата област во која ќе ја продлабочиме нашата соработка“, посочува дипломатот.
Враќањето на Трамп на светската сцена доаѓа кога Британија и ЕУ се впуштаат во она што Стармер го нарекува „рестартирање“ на односите на ОК со Брисел. Обемот на разговорите и темите сега се чини дека ќе бидат под влијание на исходот на изборите во САД.
„Тоа го отежнува животот на владата на ОК“, рече друг дипломат на ЕУ. Оддалечувањето на Велика Британија од Европа станува се потешко бидејќи најголемата светска економија изгледа сè повеќе навнатре. Исто така, не е сосема јасно дали Трамп смета дека таканаречениот „специјален однос“ меѓу САД и Обединетото Кралство е навистина толку посебен, според овој дипломат.
Црвените линии на британскиот премиер Кир Стармер за задржување на ОК од единствениот пазар, царинската унија и слободата на движење беа главната пречка за преговорите досега и го ограничуваат опсегот на она што може да се направи. Сепак, Британија се бореше да ја замени и надомести загубената трговија со ЕУ. Канцеларијата за буџетска одговорност на земјата предупреди на крајот на октомври дека слабите трговски податоци, кои го кочат растот, го одразуваат „постојаното влијание на Брегзит“.
Планот на Трамп да воведе општи царини на увозот од 10% до 20% може да ги влоши работите и да ја чини Британија околу 22 милијарди долари годишно извоз, проценуваат економистите од Центарот за инклузивна трговска политика на Универзитетот во Сасекс.
„Обединетото Кралство мора да ги преиспита своите црвени линии и мора да излезе со нов план“, изјави за медиумите дипломат од ЕУ.
Некои набљудувачи веруваат дека ОК може да се приближи и до Брисел и со Вашингтон.
„Треба енергично да притискаме за подобар договор со ЕУ, иако тоа нема да биде лесно. Новата влада е посветена на ова и мора да продолжи со оваа посветеност“, изјави поранешниот главен економист на Банката на Англија, Енди Халдејн за „The Guardian“.
Според него, тоа не исклучува, колку и да е тешко, да се постигне договор за слободна трговија со САД за време на новиот мандат на Доналд Трамп.
Сепак, другите не се убедени. „Не гледам некој посебен договор за ОК“, коментира за Тајмс Ким Дарк, поранешен амбасадор на земјата во Вашингтон. Потезите на Трамп „ќе бидат доста предизвикувачки за нас“, додава Дарк.
Доколку Британија не обезбеди некаков вид ослободување од општите тарифи на Трамп, Стармер ќе мора да размисли за рестартирање на односите со ЕУ.
„Имаме изолационистички новоизбран претседател во САД. Загрижен сум што коментарите на Трамп за кампањата не се само слогани на кампањата, туку начинот на кој тој има намера да владее. За мене, тоа се причините зошто ни треба повеќе Европа во ОК“, рече пратеникот на либералдемократите Ричард Форд пред толпата во Лондон.
