Тајванскиот „Foxconn“, најголемиот светски подизведувач за електроника, ги надмина очекувањата објавувајќи ги своите највисоки приходи за третиот квартал досега, поради големата побарувачка за сервери за вештачка интелигенција (AI).
Приходите на најголемиот снабдувач на „iPhone“ се зголемија за 20,2% на годишно ниво на 1,85 трилиони нови тајвански долари (57,3 милијарди американски долари).
„Резултатите ги надминаа првичните очекувања за значителен раст“, велат од компанијата.
Износот ја надмина и прогнозата на „LSEG SmartEstimate“ за 1,79 трилиони нови тајвански долари.
„Силната побарувачка за сервери со вештачка интелигенција доведе до значителен раст на приходите за одделот за облак и мрежни производи“, велат од „Foxconn“, чии клиенти ја вклучуваат и „Nvidia“.
Единицата за паметна потрошувачка електроника, која го вклучува „iPhone“, ужива силен раст на квартална основа благодарение на лансирањето на новите производи. Сепак, не е забележана промена на годишна основа.
Традиционално, третиот квартал е кога тајванските технолошки компании почнуваат да се натпреваруваат за снабдување со паметни телефони, таблети и друга електроника на големите компании како „Apple“ во врска со сезоната на празници на крајот на годината на западните пазари.
Вкупниот приход за септември достигна 733 милијарди нови тајвански долари, што е раст од 10,9% на годишно ниво и второ највисоко ниво за месецот.
„Како што влегуваме во шпицот на сезоната во втората половина од годината, очекуваме нашите операции постепено да добиваат на интензитет“, рече „Foxconn“ во својата прогноза за тековниот квартал.
Компанијата не дава прогноза со конкретни податоци.
Од почетокот на годината, цената на акцијата на „Foxconn“ скокна за 86%, значително надминувајќи го поширокиот тајвански пазар, што е во пораст за 24% за периодот. Акциите на компанијата ја завршија трговската сесија со раст од 3,7%.
„Foxconn“ ќе ги објави своите целосни резултати за третиот квартал на 14 ноември.
