Климатските промени, продлабочувањето на вооружените конфликти, растечкиот должнички товар и намалувањето на меѓународната поддршка ќе ги забрзаат хуманитарните кризи во светот во 2024-та година, покажуваат податоците на Меѓународниот комитет за спас (IRC), цитиран од „Reuterѕ“.
Во својот извештај за вонредните настани што треба да се следат во 2024-та година, организацијата со седиште во Њујорк именува 20 земји, главно во Африка, кои се најмногу изложени на ризик од влошување на хуманитарната ситуација следната година.
Извештајот доаѓа откако бројот на луѓе на кои им е потребна хуманитарна помош оваа година се искачи на 300 милиони, а бројот на луѓе кои беа принудени да ги напуштат своите домови се искачи на 110 милиони.
„Ова се најлошите податоци досега“, рече во изјавата началникот на „IRC“, Дејвид Милибанд, повикувајќи на поголем фокус на климатската адаптација, зајакнување на жените, банкарство на принципот „луѓето на прво место“, поддршка на раселените народи и активности за ограничување на неказнивоста.
Судан е на врвот на листата на „IRC“ на итни случаи што треба да се следат, а потоа следат окупираните палестински територии и Јужен Судан.
Следат девет земји од субсахарска Африка, Мјанмар и Авганистан во Азија, Сирија, Либан и Јемен на Блискиот Исток, Украина во Европа, Еквадор во Јужна Америка и Хаити во регионот на Карибите.
Овие 20 територии сочинуваат околу 10% од светската популација, но во исто време 86% од глобалните хуманитарни потреби, 70% од луѓето принудени да ги напуштат своите домови и зголемен дел од луѓето кои живеат во екстремна сиромаштија и се соочуваат со климатски ризици, забележува „IRC“.
Судан, кој не беше вклучен минатата година, се најде на врвот на рангирањето бидејќи големите урбани војни добија „минимално меѓународно внимание“, забележа организацијата. Палестинската територија Газа влегува во 2024-та година како најсмртоносно место во светот за цивили.
Додека некои африкански земји постигнуваат брзи подобрувања во животниот стандард, конфликтите, државните удари и сиромаштијата растат со „алармантни стапки“, соопшти „IRC“, а климатскиот феномен Ел Нињо ги загрозува екстремните временски услови.
Еквадор, дом на многу бегалци од Венецуела, за прв пат се најде на листата бидејќи порастот на насилниот криминал, кој земјата во голема мера го припишува на шверцот со дрога, ги продлабочува економските последици од пандемијата и климатските ризици.
Во исто време, „IRC“ верува дека речиси половина од населението на Хаити има потреба од хуманитарна помош и додава дека е малку веројатно дека евентуалниот напор на ОН да и помогне на полицијата во борбата против моќните вооружени банди значително да ги подобри условите следната година.
