Германскиот развивач на деловен софтвер „SAP“ гледа огромен потенцијал за раст во технологијата за генеративна вештачка интелигенција.
Ова го открил извршниот директор на гигантот Кристијан Клајн за деловниот дневен весник „Handelsblatt“ во интервју објавено денеска, пренесува „Reuters“.
„Во моментов, ние во „SAP“ се занимаваме со пазар од 500 милијарди долари. Предвидуваме дека потенцијалот значително ќе се зголеми преку генеративната вештачка интелигенција. Целиот развој е огромен двигател на растот на нашата компанија“, коментира тој.
Клајн ги споменува човечките ресурси како пример за тоа каде технологијата може да се примени.
„Во иднина, системот треба да може да ги конфигурира и автоматизира работните чекори“, забележува тој.
Извршниот директор на „SAP“ исто така коментира дека генеративната вештачка интелигенција ќе може да се справи со некои административни задачи, како што е управување со деловни состаноци.
Во средината на мај, „SAP“ соопшти дека ќе ја продлабочи соработката со „Microsoft“ на заеднички проекти во областа на генеративната вештачка интелигенција насочена кон регрутирање.
