„Lordstown Motors“ планира да преземе правна постапка против инвеститорот „Foxconn“ за да обезбеди тајванската индустриска групација да го заврши планираното купување на речиси 10 отсто од акциите на стартапот за електрични возила.
Компанијата и нејзините ривали во секторот за електрични автомобили се соочуваат со проблеми бидејќи пристапот до капитал е комплициран од зголемените каматни стапки и економската несигурност.
Производителот на електрични автомобили претходно предупреди дека би можел да биде принуден да поднесе барање за заштита од банкрот, наведувајќи ја неизвесноста околу инвестицискиот договор од 170 милиони долари со „Foxconn“, според кој тајванската компанија ќе има речиси 20 отсто удел во американска компанија.
„Foxconn“ моментално поседува нешто повеќе од 8% од компанијата, според пресметките на „Refinitiv“.
Оттогаш, „Foxconn“ инвестираше 52,7 милиони долари и се воздржува од стекнување дополнителни акции, наведувајќи го прекршувањето на договорот, велат од „Lordstown“.
Во петокот, американскиот концерн, именуван по град во Охајо каде што е со седиште, објави во соопштение дека верува оти „Foxconn“ веројатно нема да го исполни ветеното купување, повикувајќи се на писмото што тајванската компанија го испрати до „Lordstown“ претходно овој месец.
„Компанијата верува дека различните прекршувања на инвестицискиот договор од страна на „Foxconn“ и моделот на лоша волја предизвикале материјална и непоправлива штета на компанијата“, додадаваат од „Lordstown“.
Производителот на електрични автомобили, чии акции паднаа за повеќе од 80% во оваа година, изјави претходно во мај дека можеби ќе треба да го прекине производството на пикапот „Endurance“ во блиска иднина, освен ако не најде партнер.
