„Yum Brands“ ги надмина очекувањата на „Wall Street“ за кварталните споредливи приходи од продажба бидејќи зделките на „KFC“ и буритото на Taco Bell од 2 долари привлекоа повеќе клиенти свесни за инфлацијата во неговите ресторани.
Веста доведе до пораст од 1,6% на цената на акцијата на „Yum“ пред почетокот на трговскиот ден во САД.
Зголемувањето на цените на менито во традиционалните ресторани за јадење, со цел да им се помогне на бизнисите да се справат со зголемените трошоци, ги турна потрошувачите кои сакаат да јадат надвор кон синџирите за брза храна како „KFC“ и „Taco Bell“, каде што храната е поприфатлива, а промоциите се почести.
Од „Yum“ велат дека новите понуди на „KFC“ помогнале да се зголемат глобалните приходи од продажба на локации отворени најмалку една година за 7% во третиот квартал.
Минатата недела, „McDonald’s“, исто така, ја надмина просечната прогноза за приходи и профит, поттикнати од зголемениот сообраќај во неговите ресторани, каде што има поевтини менија.
„Се чини дека вредноста навистина е поголем фактор денес отколку што беше пред шест или девет месеци“, рече извршниот директор на „Yum“, Дејвид Гибс, на разговор со аналитичарите.
„Yum“, кој исто така е сопственик на ланецот „Pizza Hut“, рече дека неговите споредливи приходи од продажба во светот се зголемиле за 5% во последниот квартал. Според податоците на „Refinitiv“, аналитичарите очекуваа пораст од 3,2%.
Приходите од продажба на локациите на „Taco Bell“ се зголемија за 6% во кварталот, поттикнати со додавањето на нови понуди од 2 долари бурито во менито.
Аналитичарите во „Cowen & Co“ велат дека враќањето на популарната „мексиканска пица“ на „Taco Bell“ во септември веројатно ќе ја зголеми продажбата во САД уште повеќе овој квартал.
Со исклучок на одредени еднократни ставки, „Yum Brands“ заработи 1,09 долари по акција, што е помалку од проценките од 1,14 долари по акција. Компанијата го обвини влијанието на посилниот долар и изгубениот профит поврзани со излегувањето на „KFC“ од рускиот пазар.
