Извршниот директор на „Starbucks“, Хауард Шулц им рече на инвеститорите дека синџирот кафе очекува двоцифрен раст на приходите и заработката по акција на долг рок, бидејќи го спроведува планот за заживување на бизнисот, објави „CNBC“.
Прогнозата за приходите е малку подобра од претходната долгорочна прогноза што компанијата ја даде кон крајот на 2020-та година.
Новата стратегија треба да одговори на начинот на кој бизнисот на гигантот се трансформираше во последните години. Менито порасна, а пијалоците со ладен кафе сега сочинуваат 60% од нарачките во текот на годината, често вклучувајќи додатоци како што се различни сирупи. Наместо да нарачуваат во кафулињата, клиентите се повеќе возат до шалтер или ја користат мобилната апликација „Starbucks“.
Овие промени во однесувањето на потрошувачите донесоа стрес кај баристите и ги направија кафулињата помалку ефикасни.
Претходната долгорочна прогноза на „Starbucks“ за 2023-та и 2024-та година беше за 10-12 отсто раст на заработката по акција, 8 до 10 отсто зголемување на приходите и 4 до 5 отсто зголемување на приходите од продажба во продавниците ширум светот отворени од најмалку една година.
Во мај, компанијата ја намали прогнозата за фискалната 2022-ра година поради блокадите во Кина, инвестициите во американските вработени и високата инфлација.
Компанијата сега размислува за развој на технологија за да спречи нејзините кафулиња да бидат преоптоварени со премногу нарачки. Ова е дел од напорите за зајакнување на бизнисот и подобрување на работните услови за вработените.
Напливот на дигитална нарачка, што сега сочинува речиси половина од сите нарачки, му помогна на синџирот да добие пазарен удел за време на пандемијата, но исто така е причина за исцрпеност на баристите.
„Starbucks“ работи на имплементирање на технологија која ќе испраќа нарачки до кафулиња кои имаат капацитет всушност да ги пополнат, наместо до локации кои се веќе пренатрупани со клиенти, на пример, открива главниот директор за технологија Деб Хол Лефевр.
Акциите на „Starbucks“ паднаа за 2,4% во раните попладневни тргувања во САД.
