Европската комисија (ЕК) ќе ги задржи своите правила за долгот „замрзнати“ и во следната година, кога фискалната рамка на ЕУ мора повторно да стапи на сила, се вели во нацрт-директивата до која дојде „Politico.eu“.
Насоките, доколку останат непроменети, ќе бидат големо олеснување за Франција, Италија и Шпанија, кои се меѓу земјите на ЕУ со драматично зголемен должнички товар поради пандемијата, наведуваат медиумите.
Брисел ги паузираше правилата во март 2020-та година за земјите да можат да го издржат нападот на пандемијата без страв од казна. Идејата беше правилата повторно да стапат на сила на почетокот на 2023-та година.
Новата порака на Комисијата накратко: Извршната власт на ЕУ ќе биде попустлива – под услов владите да ги контролираат своите финансии и да почнат да ги намалуваат своите долгови.
Комисијата планира да ги претстави своите нови насоки за фискалната политика на земјите-членки на ЕУ на почетокот на март за да можат да започнат со планирање на нивните буџетски проекти.
Нацрт-инструкцијата е навестување за тешкотиите во зајакнувањето на т.н Пакт за стабилност и раст по пандемијата. Земјите потрошија многу за да спречат масовна невработеност и банкротства во услови на националните блокади, кои го зголемија долгот низ Европа.
Пактот го ограничува буџетскиот дефицит на 3% од економското производство и долгот на 60%. Земјите со нивоа на долг над овој праг треба да го намалат јазот за 5% годишно.
Долго време се зборува за реформирање на правилата и летово беа поднесени предлози за промени. Комисијата не гледа причина за целосна примена на правилата за долгот, бидејќи тие и онака наскоро би можеле да се променат, се вели во документот.
„Во очекување на исходот од прегледот на економското владеење, Комисијата нема да наметне индикатор за намалување на долгот како што е моментално формулиран“, се додава во нацртот.
„Комисијата ќе продолжи да го следи развојот на долгот во согласност со барањата на Договорот“, се наведува во упатството.
Деликатниот акт за балансирање на Комисијата е комплициран од зголемувањето на цените на енергијата и брзото ширење на омикронската варијанта на коронавирусот. Двојниот удар го попречи растот до тој степен што Меѓународниот монетарен фонд неодамна ги намали прогнозите за еврозоната во оваа година за 0,4 процентни поени на 3,9%.
Економскиот комесар Паоло Џентилони ќе ја претстави новата прогноза на ЕК. Исто така, ќе ги покрие растечките тензии меѓу Западот и Русија околу Украина и континуираниот ризик од нови варијанти на коронавирус како фактори кои влијаат на растот.
Постојаната неизвесност е добра причина да се олеснат правилата за долгот.
„Го видовме ефектот од пребрзо заострување, од мерките за штедење од последната криза пред една деценија“, рече Џентилони во говорот на Универзитетот Бокони. „Верувам дека правилата треба да се реформираат за да се осигури дека високите нивоа на долг ќе се намалат на попостепен и пореален начин, без задушување на растот“, додаде тој.
Меѓу најпогодените земји се Белгија, Кипар, Франција, Грција, Италија, Шпанија и Португалија, од кои сите веќе имаат повеќе од 100% од БДП-то. Примената на правилата какви што се би предизвикала нова ера на штедење, слична на политиките по финансискиот колапс во 2008-ма година, што ја турна еврозоната во должничка криза.
Повторувањето на ситуацијата ќе биде штетно за закрепнувањето на Европа и ќе ја поткопа скапата битка на континентот против климатските промени. Оваа реалност поттикна повици од националните главни градови и академици да ги олабават правилата за да можат земјите да управуваат со својот долг додека инвестираат во зелени проекти за намалување на емисиите.
„Потребно е да се обезбеди постепено фискално прилагодување во земјите-членки со високи долгови за да се стабилизира, а потоа и да се намали коефициентот на долгот. Премногу остра консолидација може да има негативно влијание врз растот, а со тоа и врз одржливоста на долгот“, се вели во нацртот на ЕК.
Сепак, Комисијата планира да биде построга во спроведувањето на плафонот од 3 отсто на блокот за годишниот буџетски дефицит, освен ако земјите не можат да покажат како планираат да управуваат со нивните трошоци.
Земјите од ЕУ ризикуваат да покренат процедура за прекумерен дефицит доколку го прекршат правилото.
