Туристичката компанија „Expedia Group“ оствари добивка во третиот квартал, поддржана од нејзината единица за изнајмување имот за одмор „Vrbo“, со оглед на зголемената побарувачка за туристички услуги во лето.
Цената на акциите на компанијата порасна за 11% за време на тргувањето по работното време, пишува „Bloomberg“.
Нето добивката достигна 362 милиони долари во трите месеци до крајот на септември, што е зголемување од загубата од 221 милион долари од пред една година. Заработката по акција, без некои трошоци, е 3,53 долари, над просечната прогноза на аналитичарите од 1,63 долари по акција, според податоците собрани од „Bloomberg“. Приходите се зголемија за 97% на 2,96 милијарди долари, надминувајќи ги очекувањата.
„Со оглед на раните позитивни сигнали во четвртиот квартал и фактот што многу земји објавија дека се отворени за меѓународни патници, ние сме сè поуверени во континуираното закрепнување“, рече извршниот директор Питер Керн.
„Expedia“ ги следи другите онлајн туристички компании кои покажуваат закрепнување од раните денови на кризата со Ковид-19, кога патувањето беше запрено. „Airbnb“ објави рекордна продажба и профит, а „Booking Holdings“ има силен трет квартал со 77% раст на бруто резервациите во споредба со претходната година.
Доаѓањето на варијантата делта на почетокот на летото доведе до одредено повлекување на плановите за патување, велат директорите, но растот на побарувачката остана на многу пазари. „Expedia“, сепак, посочува дека постои „континуирана нестабилност во закрепнувањето на туризмот“.
Компанијата со седиште во САД соопшти дека нејзините бруто резервации се повеќе од двојно зголемени на 18,7 милијарди долари, но се под прогнозата на Волстрит од 20,7 милијарди долари.
Цената на акцијата на „Expedia“ порасна за 19% од почетокот на годината.
