Германскиот производител на папучи „Birkenstock“ од Линц на Рајна, планира да инвестира 100 милиони евра во проширување на производството. Четири месеци откако беше преземена од американско-француската компанија „L Catterton“, „Birkenstock“ објави планови за две инвестиции во вредност од 50 милиони евра.
Компанијата има намера да инвестира 50 милиони евра во модернизација на својата главна фабрика со 1.900 вработени во градот Герлиц во источногерманската покраина Саксонија. За слична сума, сепак, тие ќе изградат втора фабрика со прво 400, а потоа 1.000 работни места.
Што се однесува до локацијата, администрацијата сѐ уште одлучува помеѓу три до четири локации во источна Германија и северна Баварија. Одлуката се очекува да падне наесен, а производството во новата фабрика се очекува во 2023-та година, објави германската новинска агенција „dpa“.
Светски познатиот бренд за папучи „Birkenstock“ е основан во 1774-та година, а во 2019-та година компанијата оствари приход од приближно 720 милиони евра и нето добивка од 130 милиони евра.
