„Facebook“ наскоро официјално ќе го објави својот нов дигитален паричник „Novi“, базиран на блокчејн платниот систем „Diem“.
Ова го објави директорот на финансиската поделба на социјалната мрежа Дејвид Маркус, цитиран од „Business Insider“.
Според него, се очекува само конечно одобрување од сите регулаторни органи, по што новиот производ ќе може да дебитира на пазарот.
Според Маркус, „Novi“ би можел да одигра голема улога во подобрувањето на глобалниот платежен систем, кој, според него, сѐ уште е премногу скап и премногу бавен.
„Промената требаше да се случи одамна и ќе стане факт вака или онака. „Novi“ е подготвен да влезе на пазарот. Ние веруваме дека нема смисла да се одложи создавањето на поевтин, меѓусебно поврзан и достапен платен систем“, вели Дејвид Маркус, кој е поранешен претседател на „PayPal“ и ко-основач на асоцијацијата „Diem“.
Тоа е невладина организација која стои зад развојот на криптовалутата „diem“. Спаѓа во групата на таканаречени „стабилни монети“, чија вредност е обезбедена со други финансиски средства.
„Novi“ ќе им овозможи на корисниците да креираат дигитални паричници, да ги претворат средствата во криптовалутата „diem“, а потоа да ги користат за плаќања или трансфери на пари низ целиот свет.
Платформата на „Diem“ се базира на блокчејн технологија и за првпат беше воведена како дел од проектот за сопствената криптовалута на „Facebook“, „Libra“.
Сепак, проектот беше дочекан со скептицизам од страна на регулаторите, кои изразија загриженост за заштитата на личните податоци и потенцијалниот ризик од промовирање на перење пари. Ова беа главните причини за одложувањето на лансирањето на платформата, која првично беше закажана за почетокот на 2021-ва година.
Кога беше создаден „Diem“, идејата беше нејзината криптовалута да биде обезбедена со кошница од конвенционални валути и државни обврзници, но подоцна беше постигната поедноставна верзија, во која гаранцијата беше само во американски долари.
Маркус потсетува дека „Facebook“ веќе има силно финансиско трансакциско присуство со платформата „Facebook Payments“, која се користи во повеќе од 160 земји и има исплатено повеќе од 100 милијарди американски долари во текот на минатата година.
