„Nokia“ ја зголеми својата годишна прогноза како што беше ветено по повисоката од очекуваната заработка во вториот квартал. Компанијата ужива добри резултати благодарение на силниот пресврт во работењето.
Европскиот гигант сега очекува годишна нето продажба помеѓу 21,7 милијарди и 22,7 милијарди евра, што е над претходната прогноза од 20,6-21,8 милијарди евра.
Геополитичките промени и силниот поттик за намалување на трошоците ја вратија „Nokia“ во глобалната битка за лансирање на 5G само една година откако извршниот директор Пека Лундмарк ја презеде функцијата.
„Во првата половина на годината, ние ја спроведувавме нашата стратегија побрзо од планираното, што ни дава добра основа за целата година“, рече Лундмарк во изјавата, но додаде дека „Nokia“ сепак очекува вообичаените сезонски ефекти да бидат оваа година помалку изразени.
Финската компанија сега очекува годишна оперативна маргина на профит од 10% до 12%, наместо 7% до 10% како што се очекуваше претходно.
Споредливата оперативна добивка на „Nokia“ за април-јуни се зголеми на 682 милиони евра од 423 милиони евра во претходната година. Сумата ги надмина очекувањата на аналитичарите за 408 милиони евра, според „ Refinitiv “.
На 19-ти јули, компанијата го оствари својот прв договор за 5G во Кина, обезбедувајќи удел во еден од трите нови договори за 5G на „China Mobile“. Во исто време, „Ericsson“ го загуби пазарниот удел откако беше во центарот на политичкиот спор.
Се очекува „Ericsson“ да добие помал удел на 5G пазарот во Кина, откако нејзината матична земја, Шведска, одлучи да ги исклучи кинеските провајдери од своите мрежи.
Нето приходите на „Nokia“ за вториот квартал пораснаа за 4% на 5,31 милијарди евра од просечната прогноза од 5,15 милијарди евра дадена од аналитичарите.
Единицата за мобилни мрежи на „Nokia“, која се соочуваше со проблеми во последните години откако се обложи на погрешен вид чипови и изгуби клиенти, сега ја зголемува својата споредлива оперативна добивка на 249 милиони евра од 183 милиони евра пред една година.
Моторот на силни резултати за првиот квартал – одделот за мрежна инфраструктура, објави дека неговиот оперативен профит скокна на 162 милиони евра, во споредба со 66 милиони евра пред една година.
На 13-ти јули, „Nokia“ објави дека планира да ја зголеми својата прогноза, но тогаш не откри повеќе детали.
