„Revolut Ltd.“ е во рана фаза на круг за собирање средства што може да ја процени британската компанија за финтех на 20 милијарди долари или повеќе, објави „Bloomberg“ повикувајќи се на извори запознати со ова прашање.
Компанијата одржа прелиминарни разговори со инвеститорите за собирање средства, но конечни одлуки за тоа кога тоа ќе се случи или колкава ќе биде сумата, според истите извори, кои побараа анонимност. Портпарол на „Revolut“ одби да коментира.
Извршниот директор на „Revolut“, Николај Сторонски, за „Bloomberg“ овој месец изјави дека компанијата размислува да собере средства, но не даде повеќе детали. „Sky News“ во април објави дека „Revolut“ бара пазарна вредност поголема од 10 милијарди долари.
Новите собрани средства ќе ја зголемат пазарната вредност на лондонскиот „Revolut“ неколку пати, во споредба со 2020-та година, кога дигиталната банка собра 500 милиони долари со пазарна вредност од 5,5 милијарди долари. Новата пазарна вредност би го направила „Revolut“ најскапиот британски стартап, бидејќи компанијата ќе го надмине „Checkout.com“, чија вредност е проценета на 15 милијарди долари.
„Revolut“, кој обезбедува услуги за дигитално банкарство преку апликација, е дел од бранот финтех компании кои добиваат проценки вредни повеќе милијарди долари од инвеститорите.
Основана во 2015-та година, „Revolut“ има околу 15 милиони индивидуални и 500.000 деловни клиенти, а производите што ги нуди вклучуваат банкарски сметки, меѓународни трансфери на пари, криптовалути и тргување со акции, како и алатки за наплата и буџетирање.
Приходите на компанијата за 2020-та година се зголемија за 57% до 261 милиони фунти (362 милиони долари), но нејзините оперативни загуби се удвоија на 201 милиони фунти, бидејќи брзиот раст ги зголемува трошоците за вработените.
